दार्जिलिङ, श्रावण १४, भारतको पूर्वोत्तर नेपाली भाषी बाहुल्य क्षेत्र दार्जिलिङमा सोमबारबाट ७२ घण्टे बन्दको आह्वान गरिएको छ ।
गोर्खा जनमुक्ति मोर्चाले दार्जिलिङ पहाडमा आजबाट बन्दको आह्वान गरेको हो । उक्त मोर्चाका अध्यक्ष विमल गुरुङले कालिम्पोङमा पत्रकार सम्मेलन गरी गोर्खाल्याण्ड नपाएसम्म आन्दोलन जारी रहने भएकाले पूर्ण तयारीमा रहनका लागी आफ्ना नेता तथा कार्यकर्तालाई निर्देशन दिएका थिए ।
उनले यो बन्द लामो समयसम्म हुन सक्ने भन्दै जनतालाई चाहिने खाद्यान्नको जोहो गरिराख्न पनि सबै दार्जिलिङवासीमा अपील गरेका छन् ।
भारत सरकारले आन्ध्र प्रदेशबाट तेलंगानालाई अलग्गै राज्य बनाउने निर्णय गर्न लागेपछि मोर्चाले पनि लामो समयदेखिको गोर्खाल्याण्ड प्राप्तिको माग दोहोर्याएको हो ।
अध्यक्ष गुरुङले अब गोर्खाल्याण्ड टेरिटोरीअल एडमिनिष्ट्रेशन मात्र आफूहरुलाई मान्य नहुने भन्दै गोर्खाल्याण्ड राज्य नपाएसम्म आन्दोलन नरोकिने प्रष्ट पारेका छन । पश्चिम बंगाल राज्यभित्र रहेको यस क्षेत्रमा अलग राज्यका लागि दुई दशकदेखि भएको आन्दोलनमा धेरै जनाको ज्यान गैसकेको छ ।
